मंदिरातला तो....

काय माहित खरंच का ? 
मी त्याच्या नवसाने जन्मलोय......ते!

सकाळी दरवाजा उघडला
कि तो समोरच.....

पण तो कधीच मला
स्वतःहून बोलवत नव्हता 
आणि मी त्याला...

मला धार्मिकतेचा यायचा राग
आणि त्याच्या भक्तांची कीव.

शीतयुद्ध चालत 
असेल आमच्यात,

त्याच्या भोवतीच्या 'विश्वस्तांचा'
भ्रष्टाचारही मी 'याचि डोळा'
पाहायचो...

रात्री पाहायचो 
एकटा त्याला...

दिवसभराच्या गराड्यातून 
शेंदुराच्या थरात
तेलाच्या वंगणातून 
डोळे बोलायचे मात्र त्याचे.

सताड त्याचा उघडलेला दरवाजा दिसे रात्री अंधारात
आणि सताड माझे प्रश्न...

मी  फिरायचो इकडे तिकडे 
बदलायचो खूप रंग सरडयासारखे,
तरीही मी त्याचा भक्त होतो.
कारण तो त्याच्या जागी 
तसाच ठाम होता 
एकाच रंगाचा ....  

  दिनांक २७-४-१८